انسان کیلئے ایک دوست ایسا ضرور ہونا چاہیے جس کے پاس بیٹھ کر اُنس ہو۔ خوشی و پریشانی میں اس کو شریک کیا جاسکے اچھی دوستی سعادت و خوشی بختی کے اسباب میں سے ایک اہم سبب ہے ‘ایسا دوست مل جائے جس سے آپ کو نفع پہنچے اور اس کے ساتھ چلنے میں سعادت و خوشی حاصل ہو۔جعفر بن محمدؒ نے اپنے بیٹے سے کہا بیٹےتمہارے دوستوں میں جو تم سے تین بار ناراض ہوا لیکن اس نے تمہارے بارے میں کوئی غلط بات نہیں کہی تو اسے اپنا دوست رکھو۔اگر آپ چاہتے ہیں کہ دوستوں سے جھگڑے نہ ہوں۔ مہر و محبت کا تسلسل نہ ٹوٹے اگر کبھی اچھائی مل جائے تو اللہ تعالیٰ کا شکر ادا کرو اور کبھی برائی ملے تو پھر اپنے دل میں یہ خیال کر لو کہ مجھے تو پہلے ہی اس سے یہی توقع تھی۔ اس کے نتیجے میں دل میں شکایت اور بغض پیدا نہیں ہوگا اور پھر دشمنی بھی پیدا نہیں ہوگی۔
ابو العتاہیہ کہتا ہے بھائی دنیا والوں میں کون ہے جو تمہارا پورا پورا ہو تھوڑے ہی کو باقی رکھو‘ وہ تم سے نہ اکتائے جسے تم نے اپنا آپ پورا نہیں دیا‘ اگر کسی بھائی کی ساری باتیں اچھی ہوں دو یا ایک بات ناپسند ہوتو ان کی وجہ سے اسے چھوڑ دینا درست نہیں کیونکہ تھوڑا بہت قابل معافی ہے۔اچھے لوگوں سے دوستی اور محبت ہونی چاہیے۔ فرمان نبویﷺ ہے کہ آدمی آخرت میں اسی کے ساتھ ہوگا جس سے اس کو محبت ہوگی۔ رسول اللہﷺ کا فرمان مبارک ہے: جنت میں یاقوت کے کچھ ستون ہیں جن پر زبرجد کے بالاخانے ہیں ان کے دروازے کھلے ہوئے ہیں یہ دور سے اس طرح چمکتے ہوئے نظر آتے ہیں جس طرح چمکدار ستارہ نظر آتا ہے۔ صحابہ کرام رضوان اللہ علیہم اجمعین نے عرض کیا: یا رسول اللہﷺ ان میں کون حضرات رہیں گے تو آپﷺ نے ارشاد فرمایا! صرف اللہ کی خاطر آپس میں محبت رکھنے والے اور صرف اللہ کی خاطر ایک دوسرے پر خرچ کرنے والے اور صرف اللہ کی خاطر آپس میں ملاقات کو جانے والے۔ (بزار باسنادہ)۔ہمیں اللہ سے دوستی لگانا اور اس کے حبیبﷺ سے دوستی لگانا ہوگی اللہ کے حبیبﷺ کے دوست ہمارے دوست ہوں اللہ والوں سے دوستی ہو تاکہ ہر دو عالم میں کامیابی و کامرانی ہمارے قدم چومے۔
دوستوں سے صرف اللہ کیلئے محبت کیجئے خدا کے محبوب لوگ وہی ہیں جو اللہ کے دین کی بنیاد پر باہم جڑے ہوئے ہوں۔ دوستوں پر اعتماد کیجئے ان کے درمیان ہشاش بشاش رہیے افسردہ رہنے اور دوستوں کو پریشان کرنے سے پرہیز کیا کیجئے۔ دوستوں کی محفل میں بے تکلف اور خوش مزاج بن کر رہیے۔ آپ کی صحبت سے دوست اُکتا نہ جائیں بلکہ مسرت، زندگی اور کشش محسوس کریں۔
پیارے نبیﷺ کا اشاد ہے جب کسی شخص کے دل میں اپنے بھائی کیلئے خلوص و محبت کے جذبات ہوں تو اسے چاہیے کہ وہ اپنے دوست کو بھی ان جذبات سے آگاہ کردے اور اسے بتا دے کہ وہ اس سے محبت رکھتا ہے۔ (ابو دائود)
دوستوں کے ساتھ وفاداری کا سلوک کیجئے دوست کے ساتھ سب سے بڑی خیر خواہی یہ ہے کہ آپ اس کو اخلاقی اعتبار سے زیادہ سے زیادہ اونچا اٹھانے کی کوشش کیجئے اس کی دنیا بنانے سے زیادہ اس کی آخرت بنانے کی فکر کیجئے۔