کماد سے گڑ کا بننا:زمیندار جب گڑ بنانے کے لیے کماد کو بیلتے ہیں تو کماد کو بیلنے کے بعد جو شیرہ نکلتا ہے وہ ایک بہت بڑے لوہے کے کڑھائے میں جاتا ہے اوروہاں اُس کے نیچے آگ جل رہی ہوتی ہے پھر وہ وہاں گرم ہو کر گاڑھا ہوتا ہے پھر گڑ بنتا ہے۔مجھے ایک صاحب نے بتایا کہ ایک زمیندار اپنے کھیت میں اِس طرح کام کررہا تھا اوراُس کی بیوی اُس کے لیے کھانا لے کر آئی، دیسی گھی لگی ہوئی روٹیاں اور سالن اور لسّی وغیرہ لے کر آئی ‘ وہ کھانا رکھ کر چلی گئی۔اب زمیندار بیلنے میں گنا دے رہا تھا وہاں پر ایک بھوکا کتا آگیا۔ اب زمیندار ایک ہاتھ سے گنا دے رہاتھا اور ایک ہاتھ سے اُس کتے کو بھگائے کہ کہیں یہ روٹی اُٹھا کر نہ لے جائے، کتا بار بار لپکے اور وہ اُسے گنا دیتے ہوئے بھگائے اور کتا بیچارہ بھوکا تھا پیاسا تھا وہ نہ گیا۔کتا آگ کے اندر:جس بیلنے کو زمیندار چلار رہا تھااس بیلن کو وہیں چلتا چھوڑااور چپ کرکے کتے کے پیچھے جاکر اُسے پکڑا اورکڑاھے کے نیچے جلتی دہکتی آگ میںپھینک دیا۔کڑاھے کے نیچے آگ پورے جوبن پر تھی بلکہ بھٹی تو آتش کدہ بنی ہوئی تھی۔زمیندار آگ میں مزیدلکڑیاں ڈالتا رہا اور وہ کتاآگ میں جل کر راکھ بن گیا بلکہ اُس کی تو راکھ بھی نہ ملی۔کتا بیچارہ بھوکا تھا‘ وہ اپنی بھوک سے سیراب ہوگیا۔موت نے کتے کی بھوک پیاس کی حاجت کو ختم کردیا۔زندگی نظام پلٹتی ہے: یہ دائرے کا نظام پھرتا ہے۔پھر اِس کے کچھ عرصے کے بعد زمیندار پر مصائب و آلام کی بارش شروع ہو گئی اور پھر اِس کے اوپر ایک مقدمہ بن گیا اور پھر روز رات کو سوئے ہوئے اچانک اٹھتا اور کہتا مجھے بچائو!مجھے بچائو!مجھے کتا کاٹتا ہے۔ لوگ کہتے تھے کہ کچھ بھی نہیں ہے مگریہ کہتا ہے نہیں کتا مجھے کاٹتا ہے۔ کتامیرا گلا دباتا ہے۔ساری رات اِسی چیخ وپکار میں گزرتی کہ کتا مجھے کاٹتاہے۔اور آخرزمیندار کو نفسیاتی ڈاکٹروں کے پاس لے گئے وہاں سے پاگل خانے لے گئے انہوں نے نشے کے انجکشن لگا دیئے ، نشے کی حالت میں بھی وہ زمیندارچیخ وپکار کرتا رہااور کوئی اس کی اِس حالت کو ختم نہ کرسکتا ۔اِسی چیخ وپکار اور ذلت کی زندگی میں آخرکار وہ مرگیا۔میرے محترم دوستو!زندگی کا ایسا نظام بنائیں کہ بددعائیں ہماراتعاقب نہ کریں بلکہ دعائیں ہماراتعاقب کریں۔ایسے کام کریں کہ نسلیں بھی دعاؤں سے مستفید ہوں نہ کہ بددعائیں ہمیں اور ہماری نسلوں کھاجائیں۔(جاری ہے)