ایسی بہنوں کے لیے صبح سے شام تک سنگین قسم کے کام ہی کام ہوتے ہیں اور وہ انتہائی کوشش کرتی ہیں کہ مثالی خاتون بن کر دکھادیں۔ نتیجہ یہ ہوتا ہے کہ دو تین سال میں تھک کر رہ جاتی ہیں اور پھر کسی کام کی نہیں رہتیں۔ایک وجہ اس ذہنی کشمکش کی اعصابی خرابی بھی ہوتی ہے جو بلڈ پریشر کا نتیجہ ہوتی ہے۔ بات بات پر لڑنے کے لیے جی چاہتا ہے۔ اعصاب کایہ تنائو عرصے تک یکساں طور پر ایسی بہنوں کو بیمار کر دیتا ہے۔ ان کا دماغ تفکرات میں اتنا گرفتار رہتا ہے کہ ہاتھ کا کام بھی اچھی طرح نہیں ہوسکتا، یا پھر اپنے غصے، پریشانی اور ناپسندیدگی کے جذبات کو دل ہی دل میں دبائے رکھتی ہیں اور یہ سب اندر ہی اندر ابلتے رہتے ہیں جن کے پھوٹ پڑنے کا ہر وقت ہی اندیشہ رہتا ہے اور جب یہ پھوٹتی ہے تو اکثر گھروں کو جنت سے جہنم بنتے دیر نہیں لگتی۔
گھر کو سلیقے سے رکھنا بُرا نہیں! مگر دباؤ نہیں چاہیے!
دراصل ہر چیز کی انتہا خطرناک ہوتی ہے۔ گھر کو سلیقے سے رکھنا برا نہیں ہے بلکہ وہ دبائو جس سے یہ کام کیا گیا ہے برائی یا بیماری کی جڑ کہا جاتا ہے۔ اگر کسی بہن کو صاف شفاف گھر پسند ہے تو سبحان اللہ۔ اگر اپنے شوہر اور بچوں کو اچھے لباس میں دیکھنا چاہتی ہیں تو اس میں برا کیا ہے؟ لیکن جس وقت یہ بلند معیار سر پر سوار ہی ہونے لگے، اس وقت ہوشیار رہنے کی ضرورت ہے۔ وہ بہنیں جن کو صفائی کے وقت کھانے کا فکر بھی رہتا ہے، ایک وقت میں گویا دو کام کرتی ہیں اور اس طرح ایک کام بھی اچھی طرح نہیں ہو پاتا اور تھکن د گنی ہو جاتی ہے۔
اعصابی قوت محفوظ رکھنے کیلئے عمدہ ترکیب
اعصابی قوت محفوظ رکھنے کی ایک بہت عمدہ ترکیب چیزوں کو لکھ لینے کی ہے جو شہنشاہیت کے دور سے چلی آرہی ہے۔ ایک نوٹ بک ایسی رہنی چاہیے جو ہر وقت ہاتھ لگ سکے۔ اس میں کھانے کی ضروریات کو نوٹ کیا جاسکتا ہے، دن میں جو کام کرنے ہیں ان کا اندراج کیا جاسکتا ہے۔ کہیں جانا آنا ہوتو اس کو بھی درج کیا جاسکتا ہے۔ اس طرح سب کام نظر میں بھی رہیں گے اور سر پر بار بھی نہ ہوگا۔اے خاتون خانہ ! ہم نے چند تدابیر آپ کیلئے لکھی ہیں‘ یقیناً یہ چند سطریں آپ کو ایک مثالی خاتون بننے میں بھرپور مدد دیں گی۔