امام غزالی رحمۃ اللہ علیہ لکھتے ہیں کہ ایک بادشاہ تھا۔ اس کا ایک باغ تھا‘ اس کے کئی حصے تھے‘ بادشاہ نے ایک آدمی کو حکم دیا کہ میرے لیے اس ٹوکری میں بہترین اور عمدہ قسم کے پھل لے آؤ‘ مگر شرط یہ ہے کہ جس حصے میں جاؤاوروہاں تمہیں کوئی پھل پسند نہ آئے تو دوبارہ اسی حصے میں نہ آنا۔ وہ آدمی باغ کے ایک حصے میں داخل ہوا تو وہاں اسے کوئی پھل پسند نہ آیا۔ اسی طرح وہ ایک ایک کرکے تمام حصوں میں گیا لیکن کوئی ایک پھل بھی اس کے دل کو نہ بھایا جب وہ آخری حصے میں پہنچا تو حیرت زدہ رہ گیا کیونکہ وہاں کچھ بھی نہیں تھا اور وہ شرط کے مطابق واپس ان حصوں میں جا بھی نہیں سکتا تھا‘ جہاں پھل تھے۔ مجبوراً وہ خالی ٹوکری لے کر بادشاہ کے سامنے حاضر ہوا۔ بادشاہ نے پوچھا میرے لیے کیا لائے ہو؟ اس نے کہا کچھ بھی نہیں لایا۔ امام غزالی رحمۃ اللہ علیہ فرماتے ہیں کہ بادشاہ سے مراد اللہ رب العزت کی ذاتی ہے۔ اس باغ سے مراد انسان کی زندگی ہے اورا س کے حصوں سے مراد انسان کی زندگی کے ایام ہیں‘ ٹوکری سے مراد انسان کے نامہ اعمال ہے۔ انسان کہتا ہے میں کل سے نیک اعمال شروع کروں گا اور کل سے نماز پڑھوں گا لیکن کل کل کرتے ایک دن موت اسے اپنی آغوش میں لے لیتی ہے اور جو دن گزر جاتے ہیں واپس نہیں آتے‘ تو یہ اللہ کے پاس خالی دامن چلا جاتا ہے اس سے معلوم ہوا کہ دنیا دھوکےکا گھر ہے۔ (ہمشیرہ احمد شاہ)