(رخسانہ، رائیونڈ)

دانتوں کے سیاہ داغ
چنبیلی کے پتے اُبال کر اس کے پانی سے روزانہ صبح کے وقت کُلیاں کی جائیں تو دانتوں کے سیاہ داغ چند ہفتوں میں دور ہو جائیں گے۔
جسم کی گرمی دور کرنے کے لیے
کسی بیماری کی وجہ سے جسم میں چنگاریاں نکلتی ہوئی محسوس ہوتی ہوں یا ہاتھ پائوں جلتے ہوں تو ایسے میں خشک دھنیا پیس کر ہم وزن مصری ملا کر کھائیں یا سبز دھنیا گھوٹ کر اس میں مصری ملا کر پئیں۔ جسم کی گرمی کا اثر زائل ہو جائے گا۔
جوڑوں کا درد ختم
پیازکا پانی 60 گرام، لہسن کا پانی 30 گرام، ادرک کا پانی 30 گرام، اب ان تینوں کوایک پاؤسرسوں کے تیل میں بالکل ہلکی آنچ پر پکا لیں جب پانی جل جائے اور صاف تیل باقی رہ جائے تو اس کو ٹھنڈا کرکے اچھی طرح محفوظ کرلیں۔ اگر پٹھے سن پڑگئے ہوں، جوڑوں میں درد ہوتو اس تیل کی مالش کرنے سے یہ درد ختم ہو جائیں گے۔
تیزابیت کے لیے
جس شخص کو تیزابیت لاحق ہو وہ تیزابیت محسوس ہونے پر تھوڑا سا کھانے کا نمک چاٹ لے۔ اس سے تیزابیت ختم ہو جاتی ہے۔ (ہائی بلڈپریشر کے مریض یہ ٹوٹکہ استعمال نہ کریں)۔
بالوں کی خشکی دور کرنے کے لیے
بیسن 12 گرام، گندم کے آٹے کی بھوسی، میتھی کے بیج، رائی 36,36 گرام، خطمی 24 گرام، ان تمام اجزاء کو باریک پیس کر تھوڑے سے عرق گلاب اور خالص سرکے میں ملا کر بالوں میں اچھی طرح لگائیں اور دس منٹ بعد سادہ پانی سے دھو ڈالیں۔ یہ عمل ہفتے میں دو چار مرتبہ کریں اس سے خشکی دور ہونے کے علاوہ بال بھی مضبوط اور گھنے ہوں گے۔
الٹی کا فوری علاج
ایک عدد درمیانہ پیاز، تھوڑی سی ادرک، خشک پودینہ، نمک اور چینی حسب ذائقہ لے کر تھوڑے سے پانی میں چائے کی پتی ڈال کر ان کو ابال کر قہوہ بنالیں اور پی لیں۔ الٹی میں فوراً آرام آجائے گا۔
سفید بالوں کو سیاہ کرنے کا طریقہ
سفید بالوں کو سیاہ کرنے کے لیے تھوڑ سے خشک آملہ لے کر لوہے کے کسی برتن یعنی کڑاہی وغیرہ میں رکھ دیں اور پھر اس میں پانی ڈال کر ایک دن تک اسے اسی حالت میں بھیگا رہنے دیں۔ اگلے روز اس پانی سے سر کو دھولیں۔ یہ عمل کچھ عرصے تک کرنے سے سفید بال سیاہ ہو جائیں گے۔
عجب ٹوٹکہ آپ کے کام آئے گا
برسات کے موسم میں جب لفافے پر پتہ لکھ کر سپرد ڈاک کرنے لگیں تو ان لکھے ہوئے حروف پر ہلکا سا موم رگڑ دیں اگر بارش کی وجہ سے لفافہ گیلا بھی ہوگیا تو حروف قائم رہیں گے اور جسے خط بھیجا جارہا ہے اس تک باآسانی پہنچ جائیگا۔
خستہ کرارے چپس
چپس بناتے وقت آلوئوں کو کاٹ کر جس پانی میں رکھا جائے اس میں نمک ڈال دیں۔ اس کے بعد پانی نکال کر کسی سفید خشک کپڑے میں آلوئوںکو رکھ کر خشک کرلیں پھر تلیں بہت سفید، خستہ اور لذیذ چپس بنیں گے۔
روٹی کو ہلکا اور تازہ رکھیے
آٹا گوندھتے ہوئے اس میں لیموں کے دو یا تین قطرے ڈالنے سے روٹی بہت ہلکی اور تازہ پکتی ہے اور ذائقے میں بھی کوئی فرق نہیں پڑتا۔
تندوری روٹیوں کو گرم کرنا
ٹھنڈی تندوری روٹیوں کو گرم کرنے کے لیے ان روٹیوں کو پانی سے تھپتھپا کر پھیلے ہوئے گرم توے پر ہلکی آنچ پر دس منٹ کے لیے رکھ دیں اور اس توے کو ایک کپڑے سے ڈھک دیں دس منٹ بعد روٹیاں نکالیں۔ روٹیاں بالکل تازہ نکلیں گی۔