(شاہ شمروز، ایبٹ آباد)

محترم حضرت حکیم صاحب السلام علیکم!پرانی کتابوں سے ایک نسخہ بنام ’’جوارش املی‘‘ ملا۔ جو آپ کو بھیج رہا ہوں۔ عبقری رسالہ کا کئی سالوں سے قاری ہوں پرانے رسالے خرید کر رکھے ہیں اور دوسروں کو پڑھنے کے لیے دیتا ہوں تقریباً ہر بیماری کا سستا علاج آپ کے رسالوں کے اندر موجود ہے۔ گرمیوں کے دنوں میں اور برسات کے موسم میں گاہ بگاہ اس دوا کو استعمال کرتے ر ہنے سے بدہضمی اور ہیضہ سے بچائو رہتا ہے۔ بدہضمی اور ہیضہ میں جب پیاس کی شدت ہوتی ہے تو اس کی ایک ہی خوراک سے پیاس کا زور ٹوٹ جاتا ہے مقوی قلب ایسی ہے کہ سرد ہوتا ہوا جسم اس کے استعمال سے بتدریج گرم ہونے لگتا ہے اور ڈوبتا ہوا دل ایک دم سہارا لے لیتا ہے۔ بہت سی حاملہ عورتوں کو دوران حمل زمانے میں قے اور متلی شروع ہو جاتی ہے کئی کئی روز کھانے کی طرف نظر اٹھا کر نہیں دیکھ سکتیں۔ ان کے لیے بھی یہ دوا بے حد مفید ہے اس سے نہ صرف قے متلی جاتی رہتی ہے بلکہ کھانے کی طرف بے اختیار رغبت ہوتی ہے۔ اس دوا کا طبی نام جوارش املی ہے۔ نسخہ حسب ذیل ہے۔ املی، آلو بخارہ ایک ایک پائو لے کر تھوڑے سے پانی میں بھگو دیں تاکہ اچھی طرح پانی میں بھیگ جائیں اگر رات کو بھگوئیں تو زیادہ اچھا ہے۔ صبح مل کر چھان لیں پھر اس میں تین کلو چینی ڈال کر پکائیں جب شہد کے قوام پر آجائے تو درج ذیل دوائیں جو پہلے سے پسی ہوئی ہوں ڈال کر اچھی طرح ملا دیں۔ جنگلی پودینہ خشک پانچ تولے، انار دانہ دس تولے، سونٹھ پانچ تولے، زرشک دس تولے، منقیٰ دس تولے، پوست آملہ خشک پانچ تولے، ست لیموں پانچ تولے، مقدار خوراک ایک تولہ یعنی( ایک چائے کا چمچ) وقفہ وقفہ سے چٹائیں۔ شدید حالتوں میں پندرہ پندرہ منٹ کے وقفہ سے دیں جوں جوں مریض کو آرام آتا جائے وقفہ بڑھاتے جائیں۔ عام لوگوں کے لیے دن میں دو بار یا ایک بار آدھا چائے کا چمچ چاٹ لینا کافی ہے۔