محترم حضرت حکیم صاحب السلام علیکم! آپ اور آپ کے کارخیر سے جڑے ہر شخص کے لیے کروڑوں دعائیں۔ 2013ء سے تسبیح خانہ سے تعلق ہے۔ ہم پر شدید جادو تھا‘ شادی، رزق، کاروبار ہر چیز پر بندش تھی۔ ہم نے آپ سے ملاقات کا ٹوکن لے کر آپ سے آپ کے کلینک میں ملاقات کی‘ آپ کے سامنے اپنے مسائل رکھے‘ آپ نے ان سے نجات کیلئے ہمیں ایک وظیفہ یارب موسیٰ یارب کریم بسم اللہ الرحمٰن الرحیم ہروقت کھلا پڑھنے کے لیے دیا اور ساتھ 21 جمعرات تسبیح خانہ لاہور میں درس سننے کیلئے کہا۔ درس اور اس وظیفے کی بدولت ہر مشکل حل ہوتی گئی‘ شادی بھی ہوگئی۔ درس میں اب بھی شرکت کرتی ہوں اور اعمال بھی کررہی ہوں۔ درس میں آپ نے ایک مرتبہ صدقہ کی فضیلت بتائی‘ میں صدقہ ضرور دیتی ہوں‘ روزانہ بیس روپے اپنے اور بیس روپے اپنے شوہرصاحب کیلئے نکالتی ہوں۔ میری ایک رشتہ دار ہے‘ جس نے میرا جینا حرام کیا ہوا تھا‘ ہروقت طنز‘ طعنے ’مار‘ ہی دیتی تھی‘ عملیات بھی کررہی تھی اور مجھے نیچا دکھانے کا کوئی موقع ہاتھ سے نہ جانے دیتی‘ پھر میں نے ایک ڈبہ اس کیلئے بنایا‘ اس کو ٹیپ سے سیل بند کیا اس میں ایک سوراخ کیا اور روزانہ اس کی نیت سے اس میں دس روپے ڈالنا شروع کردیا اور نیت یہ رکھی کہ اللہ مجھے اس کے شر سے محفوظ رکھے۔ حیران کن طور پر دو مہینے گزر گئے ہیں وہ بالکل ٹھیک ہوگئی ہے۔ اس نے کبھی کسی سے میرے بارے اب کوئی بات نہ کی بلکہ مجھ سے بھی اخلاق سے ملتی ہے۔ (م۔س، ملتان)