محترم حضرت حکیم صاحب السلام علیکم! ایک آزمودہ روحانی عمل بھیج رہی ہوں۔ہمارے گھر میں وائرنگ کا کام ہورہا تھا‘ جب الیکٹریشن بھائی کام کررہا تھا تقریباً سارا کام مکمل ہوگیا‘ ایک جگہ پر رکاوٹ پڑگئی بجلی کی تاریں آگے نہیں آرہی تھیں‘ اس بھائی نے بہت کوشش کی کہنے لگے باجی کل آؤں گا اور اس جگہ کو مکمل توڑوں گا اور تاریں گزار کر دوبارہ سیمنٹ سے پلستر کردوں گا۔ یہ میرے بس سے باہر ہے‘ اس کے جانے کے بعد میں نے اول و آخر درودشریف کے ساتھ 4 مرتبہ سورۂ قریش پڑھ کر اس جگہ پر پھونک ماری تو آپ یقین کریں ابھی میں اندر کمرے میں آئی تھی کہ میرے بیٹے نے ایسے ہی تاروں کو آگے کی طرف دھکیلا تو تاریں بالکل آرام سے دوسری طرف سے باہر آگئیں‘ میرا بیٹا بھاگتا ہوا میرے پاس آیا امی جان کمال ہی ہوگیا۔ صبح جب الیکٹریشن بھائی آئے تو وہ جگہ توڑنے کا مکمل سامان ساتھ لائے تھے‘ جب انہوں نے آکر دیکھا کہ تاریں تو دوسری طرف سےنکلی ہوئی ہیں توبولے یہ کیسے ہوسکتا ہے؟ میں نے انہیں سورۂ قریش کی برکت بتائی تو بہت خوش ہوئے۔ (ی، اٹک)