ماہنامہ عبقری - دسمبر 2009ء

ابن ابی حاتم میں ہے کہ جب مسلمانوں نے دمشق میں محلات اور باغات کی تعمیر اعلیٰ پیمانے پر ضرورت سے زیادہ شروع کر دی تو حضرت ابودرداءرضی اللہ تعالیٰ عنہ نے مسجد میں کھڑے ہو کر فرمایا کہ اے دمشق کے رہنے والو سنو! لوگ سب جمع ہو گئے تو آپ نے اللہ تعالیٰ کی حمد و ثناءکے بعد فرمایا کہ تمہیں شرم نہیں آتی ‘ تم خیال نہیں کرتے کہ تم نے وہ جمع کرنا شروع کر دیا ہے جسے تم نہیں کھا سکتے‘ تم نے وہ مکانات بنانے شروع کر دیئے جو تمہارے رہنے سہنے کے کام نہیں آتے‘ تم نے وہ دور دراز کی آرزوئیں کرنی شروع کر دیں جو پوری ہونی محال ہیں۔ کیا تم بھول گئے ‘ تم سے اگلے لوگوں نے بھی دولتیں جمع کر کے سنبھال سنبھال کر رکھی تھیں بڑے اونچے پختہ اور مضبوط محلات تعمیر کئے تھے‘ بڑی بڑی آرزوئیں باندھی تھیں‘ لیکن نتیجہ یہ ہوا کہ وہ دھوکہ میں رہ گئے‘ ان کی پونجی برباد ہو گئی‘ ان کے مکانات اور بستیاں اجڑ گئیں‘ عادیوں کو دیکھو کہ عدن سے لے کر عمان تک ان کے گھوڑے اور اونٹ تھے لیکن آج وہ کہاں ہیں؟ ( تفسیر ابن کثیر‘ جلد 4 ‘ صفحہ نمبر 41) نہایت ذہین بیوی امام مالک رحمتہ اللہ علیہ کے مبارک دور کی بات ہے کہ ایک شخص اپنی بیوی سے بڑا تنگ تھا اور اسے ہر حالت میں طلاق دینا چاہتا تھا‘ ایک دن اس نے دیکھا کہ اس کی بیوی سیڑھیاں چڑھ رہی ہے‘ اس نے بیوی کو مخاطب کیا اور کہنے لگا: سنو ! اگر تو اوپر چڑھی تو تجھے طلاق‘ نیچے اتری تو طلاق اور اپنی جگہ کھڑی رہی تو پھر بھی طلاق۔ اس عورت نے اپنے خاوند کی طرف دیکھا‘ لمحہ بھر کیلئے رکی‘ ذرا سوچا اور پھر اس کے خاوندنے دیکھا کہ اس نے سیڑھی سے چھلانگ لگا دی۔ خاوند کی حسرتوں پر پانی پھر گیا‘ اپنی بیوی سے مخاطب ہوا‘ میر ے ماں باپ تجھ پر قربان ! تو کتنی بڑی فقیہہ ہے۔ امام مالک رحمتہ اللہ تعالیٰ وفات پا جائیں تو ممکن ہے اہل مدینہ فتویٰ کیلئے تیرے ہی پاس آئیں۔ (سنہری کرنیں‘ صفحہ 55) پچھلا صفحہ