ماہنامہ عبقری - اپریل 2009ء

پیغمبر اسلام صلی اللہ علیہ وسلم کا غیر مسلموں سے حسن سلوک عمرہ کیلئے حضرت ثمامہ رضی اللہ عنہ کا مکہ آنا رحمتہ للعالمین صلی اللہ علیہ وسلم نے کفار مکہ کی جفا کاریوں کے جواب میں ان کے ساتھ جو سلوک کیا وہ آپ صلی اللہ علیہ وسلم ہی کا حصہ تھا۔ شہر مکہ میں کوئی چیز پیدا نہیں ہوتی، ہر چیز باہر سے آتی ہے لہٰذا وہاں غلہ یمامہ سے آتا تھا۔ یمامہ کے حاکم حضرت ثمامہ رضی اللہ عنہ بن اثال نے مشرف بااسلام ہونے کے بعد بارگاہ نبوی صلی اللہ علیہ وسلم میں گزارش کی یا رسول اللہ صلی اللہ علیہ وسلم! مجھے آپ کے سواروں نے اس وقت گرفتار کیا جب میں عمرہ کی نیت سے عازم مکہ تھا۔ اب آپ کیا حکم دیتے ہیں؟“ آپ نے فرمایا ہاں اب جاکر عمرہ کر لو چنانچہ وہ اس غرض سے وارد مکہ ہوئے۔ حضرت ثمامہ رضی اللہ عنہ کو بے دینی سے مطعون کرنا جب عمائدین قریش کو معلوم ہوا کہ ثمامہ رضی اللہ عنہ بت پرستی سے بیزار ہو کر دائرہ اسلام میں داخل ہو گئے ہیں تو ان کو تبدیلی مذہب پر عار دلانے اور بے دین کہہ کر پکارنے لگے۔ حضرت ثمامہ رضی اللہ عنہ نے غصہ سے کہا کہ بے دین تو تم ہو جو رب العالمین کی جگہ پتھروں کو پوجتے ہو۔ میں نے تو دنیا کا سچا آسمانی دین قبول کیا ہے۔ اس کے بعد کہنے لگے، اے اہل مکہ! کان کھول کر سن لو کہ آئندہ جب تک محبوب رب العالمین صلی اللہ علیہ وسلم کی اجازت نہیں ہو گی، یمامہ کے اناج کا ایک دانہ بھی مکہ میں نہ آنے پائے گا (بخاری ومسلم) مکہ کو اناج کی برآمدپر پابندی جب حضرت ثمامہ رضی اللہ عنہ ارض حرم سے یمامہ واپس گئے تو انہوں نے مکہ معظمہ کی طرف غلہ کی برآمد یک لخت بند کر دی۔ اس بندش سے بلدالامین میں اناج کا قحط پڑ گیا اور دشمنان دین میں کہرام مچ گیا۔ آخر قریش نے سخت اضطراب اور بدحواسی کے عالم میں اسی مرجع خلائق آستانہ کی طرف رجوع کیا جہاں سے کبھی کوئی حاجت مند اور سائل محروم نہیں گیا تھا۔ رحمت عالم صلی اللہ علیہ وسلم کو رحم آگیا اور آپ نے ثمامہ رضی اللہ عنہ کے نام پیغام بھیجا کہ بندش اٹھا لو چنانچہ پھر حسب معمول اناج کی روانگی شروع کر دی گئی۔ پچھلا صفحہ