مراقبے کے جب کمالات کھلیں گے تو حیرت کا انوکھا جہان اور مشکلات کا سو فیصد حل خود آپ کو حیرت زدہ کر دے گا۔

Meditation یعنی مراقبہ جہاں ازل سے روحانیت کی ترقی اور مشکلات کے حل کا علاج رہا ہے وہاں جدید سائنس نے اسے امراض کا یقینی علاج بھی قرار دیا ہے۔ ہزاروں تجربات کے بعد عبقری کے قارئین کے لئے مراقبے سے علاج پیش خدمت ہے۔ سوتے وقت اگر با وضو اور پاک سوئیں تو سب سے بہتر ورنہ کسی بھی حالت میں صرف 10 منٹ بستر پر بیٹھ کر بلا تعدادیَاکَرِیْمُ یَاقَدِیْرُ کا ورد اول و آخر 3 بار درود شریف پڑھیں پھر لیٹ جائیں۔ جس مرض کا خاتمہ یا الجھن کا حل چاہتے ہوں اس کو ذہن میں رکھ کر یہ تصور کریں کہ ’’ آسمان سے سنہرے رنگ کی روشنی میرے سر سے سارے جسم میں داخل ہو کر اس مرض کو ختم یا الجھن کو حل کر رہی ہے اور اس وظیفے کی برکت سے میں سو فیصداس پریشانی سے نکل گیا/گئی ہوں‘‘ یہاں تک کہ اس تصور کو دہراتے دہراتے نیند آ جائے۔ شروع میں تصور بناتے ہوئے آپکو مشکل ہو گی لیکن بعد میں آپ پر جب اسکے کمالات کھلیں گے تو حیرت کا انوکھا جہان اور مشکلات کا سو فیصد حل خود آپ کو حیرت زدہ کر دیگا۔ مراقبے کے بعد اپنی کیفیات فوائد اور انوکھے تجربات ہمیں لکھنا نہ بھولیں۔

مراقبے سے فیض پانے والے

محترم حکیم صاحب السلام علیکم! مجھے مراقبے کا شوق عبقری میں مراقبے کے فیض کے مضامین پڑھ پڑھ کرہوا۔ شروع شروع میں تو میری توجہ بالکل ہی نہیں بن رہی تھی میری لاکھ کوشش کے باوجود میری توجہ نہیں بن رہی تھی‘ پھر میں نے آپ سےملاقات کا وقت لیا اور آپ سے ملاقات کی اور آپ کو اپنی مراقبے کی توجہ کے بارے میں پریشانی بتائی۔ آپ نے مجھے دعا دی اور رخصت کیا۔الحمدللہ اس کے بعد سے پھر توجہات آنا شروع ہوگئی ہیں۔ اسی ماہ میں نے جو مراقبہ کیا وہ درج ذیل ہے:۔مراقبے میں میں نے دیکھا کہ میں مسجد نبوی شریف کے صحن میں ہوں پھر خانہ کعبہ کے سامنے ہوں۔ مجھے محسوس ہوا کہ ایک سفید لباس میں ملبوس بزرگ ہیں ان کا قد ہم لوگوں سے لمبا ہےا ور وہ مجھے واضح نظر نہیں آئے۔ خانہ کعبہ کے سامنے کھڑے ہیں۔ ان کی سفید ڈاڑھی بھی ہے۔ پھر میں خانہ کعبہ کے دروازے کے سامنے کھڑی ہوں۔(ہ۔ ا)